तिला कर्णाली सहकारीको १३ औँ वार्षिक साधारण सभा सम्पन्न,

सुखड, असोज १२। कैलालीको घोडाघोडी नगरपालिका–२ साडेपानीमा अवस्थित तिला कर्णाली बचत तथा ऋण सहकारी संस्था लि.को १३ औँ वार्षिक साधारण सभा सम्पन्न भएको छ। संस्थाका अध्यक्ष रण बहादुर भण्डाराको सभाध्यक्षतामा सम्पन्न भएको कार्यक्रममा सुदूरपश्चिम प्रदेशका सांसद खुसीराम चौधरी ‘भिमसेन’ प्रमुख अतिथि रहनु भएको थियो । कार्यक्रममा वडा अध्यक्ष, वडा सदस्यहरू, सहकारी शाखाका प्रमुख हेमकान्त सुबेदी, विभिन्न सहकारी संस्थाका प्रतिनिधि, प्रहरी र सहकारीका शेयर सदस्यहरूको समेत उपस्थिति रहेको थियो ।

आर्थिक वर्ष २०८०÷८१ को १२ करोड ३२ लाख ६३ हजार ८ रुपैयाँ बराबरको आय–व्यय विवरण संस्थाका व्यवस्थापक लाल बहादुर भण्डारीले सभामा प्रस्तुत गर्नु भएको थियो । २०६८ साल फागुन ९ गते साडेपानी नयाँ बजारमा स्थापना भएको तिला कर्णालीले छोटो समयमा उल्लेखनीय प्रगति हासिल गरेको छ ।

आर्थिक रूपमा पछाडि परेका नागरिकहरूलाई सानो लगानीबाट उद्यमी बनाउन सहयोग पु¥याउने उद्देश्यले सञ्चालन भएको सहकारी १३ औँ वर्षमा प्रवेश गरेको छ । ३२ जनाको शेयरबाट सुरु भएको सहकारीमा हालसम्म ६ हजार १ सय २१ जना शेयर सदस्यहरू रहेका छन् । सहकारीले आर्थिक सम्पन्नताका लागि शेयर सदस्यहरूलाई व्यवसायमुखी बनाउने लक्ष्य लिएको छ ।

साधारण सभामा सहकारीले दैनिक बचत, बाल बचत, ऐच्छिक बचत, आवधिक बचत, सदस्य सुरक्षण, र सुपर सेभिङका उत्कृष्ट बचतकर्ताहरूलाई सम्मान गरेको थियो । कार्यक्रम घोडाघोडी बहुमुखी क्याम्पसको सभा हलमा सम्पन्न भएको थियो । तिला कर्णाली बचत तथा ऋण सहकारी संस्थाका उपाध्यक्ष भरत राज शर्माको स्वागत मन्तव्यसँगै सुरु भएको कार्यक्रमको सञ्चालन सचिव चक्र बहादुर विष्टले गरेका थिए।