दशैं-तिहारका लागि सुदूरपश्चिममा ११ हजार प्रहरी परिचालन, सुरक्षा व्यवस्था कडा

१४ असोज, धनगढी । आसन्न दशैं, तिहार र छठ पर्वलाई लक्षित गरी सुदूरपश्चिम प्रदेशमा ११ हजार प्रहरी परिचालन गरिने भएको छ। प्रदेश प्रहरी कार्यालय धनगढीले चाडपर्वलाई ध्यानमा राख्दै बनाएको सुरक्षा योजनाअनुसार सामान्य समयमा भन्दा ४ हजार बढी प्रहरी परिचालन गरिनेछ।

प्रहरी नायब महानिरीक्षक (डीआईजी) रवीन्द्र केसीका अनुसार चाडपर्वको समयमा हुनसक्ने सम्भावित सुरक्षा चुनौतीको विश्लेषण गरी थप प्रहरी परिचालन गरिएको छ। सामान्य समयमा ७ हजार प्रहरी परिचालन हुने गरे पनि चाडपर्वका लागि प्रदेशभरि ११ हजार प्रहरी परिचालन गरिने योजना छ।

डीआईजी केसीले प्रदेशका विभिन्न प्रहरी कार्यालय र सशस्त्र प्रहरी गणका थप ४ हजार प्रहरीलाई फिल्डमा खटाउने योजना बनाइएको बताए। ‘सुरक्षा चुनौतीलाई मध्यनजर गर्दै हामीले थप प्रहरी परिचालन गरेका छौं,’ उनले भने।

सुदूरपश्चिम प्रदेशमा विगतका चाडपर्वका समयमा भएका अपराधिक गतिविधिहरूको विश्लेषण गर्दै यस वर्ष त्यस्ता गतिविधि हुन नदिन विशेष योजना बनाइएको छ। सीमा क्षेत्रमा चोरी, तस्करी, ठगी र लुटपाट जस्ता अपराध नियन्त्रण गर्न छुट्टै प्रहरी टोली खटाइनेछ।

सवारी दुर्घटना न्यूनीकरणका लागि चेकिङ्ग बढाइनेछ र जनचेतनामूलक सन्देशहरू प्रवाह गरिनेछन्। सीमा नाकाबाट फर्किने नेपालीहरूलाई कुनै प्रकारको हैरानी हुन नदिन थप निगरानी बढाइने पनि डीआईजी केसीले जानकारी दिए।

सबै जिल्लामा जिल्ला प्रहरी प्रमुखको नेतृत्वमा चाडपर्व लक्षित सुरक्षा योजना लागू हुनेछ। पिकेट, पैदल गस्ती, मोबाइल गस्ती, नेपाल प्रहरी र ट्राफिक प्रहरीले संयुक्त रूपमा चेकजाँच गर्ने कार्यलाई निरन्तरता दिइनेछ।

डीआईजी केसीका अनुसार, प्रदेशभरि ९९ कमाण्ड पोस्ट, २०६ जनाको रिजर्भ टोली, १६० जनाको स्ट्राइकिङ्ग टोली, ५५३ जनाको पिकेट, ५९९ जनाको पैदल गस्ती र २५० जनाको मोबाइल गस्ती परिचालन गरिनेछ। साथै, सीमा क्षेत्रमा २६५ जना र सादा पोशाकमा रहेका प्रहरी सुरक्षामा खटिनेछन्।

जुवा तास नियन्त्रणका लागि २५० जनाको छुट्टै टोली बनाइएको छ भने राजमार्ग क्षेत्रमा स्कटिङ्ग गर्नका लागि थप २५० जनाको टोली परिचालन गरिने योजना छ।

प्रदेश प्रहरी कार्यालयले शान्ति, सुरक्षा र सुव्यवस्थालाई मजबुत पारेर नागरिकहरूले ढुक्कसँग चाडपर्व मनाउन सकून् भनेर सबैलाई सहयोग गर्न अपिल गरेको छ।

डीआईजी केसीले भने, ‘हामीले यस वर्षको दशैं-तिहारमा कुनै अप्रिय घटना नहोस् भन्ने लक्ष्यसहित सुरक्षा व्यवस्था मजबुत गरेका छौं। प्रदेशबासीहरूलाई यो चाडपर्व उल्लासमय बनाउन आग्रह गर्दछौं। कुनै समस्या परेमा तत्काल प्रहरीलाई खबर गर्न सक्नुहुन्छ, हामी जिल्लादेखि प्रहरी चौकीसम्म तुरुन्तै रेस्पोन्स गर्नेछौं।’

प्रहरीले चाडपर्वका बेला जनचेतना अभिवृद्धि र कानुनी कारबाहीलाई पनि सशक्त बनाउने योजना बनाएको छ।