पुरुष मृत अवस्थामा फेला

स्कुटरसहित सेती लोकमार्गको कालिमाटी खण्डमा एक पुरुष मृत अवस्थामा फेला परेका छन् । साँफेबगर नगरपालिका–१ वैद्यनाथ निवासी अन्दाजी ५० वर्षीय गणेशनाथ योगी मृत अवस्थामा बुधबार बिहान फेला पर्नुभएको हो ।

स्कुटरसहित सडकभन्दा तल खसेको अवस्थामा देखिएको बताइएको छ । धनगढीमा रहेका आफन्तले आफूहरू घटनास्थल नपुग्दासम्म शव नउठाने भनेपछि शव घटनास्थलमै रहेको स्थानीय तपेन्द्र कुँवरले जानकारी दिनुभयो । घटनाका बारेमा अनुसन्धानको काम अघि बढाएको अछाम प्रहरीले जानकारी दिएको छ ।

योगी वैद्यनाथ धाम पर्यटन विकास तथा व्यवस्थापन समितिका सदस्य हुनुहुन्थ्यो ।