प्रदेशलाई अधिकार प्रत्यायोजन भए मात्र सरकार बलियो बन्छ: मुख्यमन्त्री शाह

धनगढी, असोज ३ गते । सुदूरपश्चिम प्रदेशका मुख्यमन्त्री कमलबहादुर शाहले सङ्घीय सरकारले प्रदेशको अधिकार प्रत्यायोजन गरे मात्र प्रदेश सरकार बलियो हुने बताउनुभएको छ। संविधान दिवस तथा राष्ट्रिय दिवस मूल समारोह समितिका संयोजक समेत रहनुभएका मुख्यमन्त्री शाहले बिहीबार धनगढीमा आयोजित कार्यक्रममा आफ्नो विचार राख्नुभएको थियो।

उहाँले केन्द्रीकृत मानसिकताका कारण प्रदेशलाई अपेक्षित अधिकार प्राप्त नभएको गुनासो गर्नुभयो। “सङ्घीय सरकारले प्रदेशका अधिकार पूर्णरूपमा प्रत्यायोजन नगर्दासम्म जनताको अपेक्षाअनुसार काम गर्न कठिन हुन्छ,” उहाँले भन्नुभयो।

मुख्यमन्त्री शाहले सङ्घात्मक शासन प्रणालीलाई संविधानको महत्त्वपूर्ण उपलब्धि भन्दै, यसले साझा शासन र स्वशासनको उचित तालमेल मिलाउने दाबी गर्नुभयो। उहाँले सहकारिता, सहअस्तित्व, र समन्वयको सिद्धान्तमा आधारित सङ्घीय लोकतान्त्रिक गणतन्त्रात्मक शासन प्रणालीको दिगो व्यवस्थापनका लागि संविधानले मार्गदर्शन गरेको र यसका लागि सबै पक्षको योगदान आवश्यक रहेको बताउनुभयो।

सङ्घीयताको कार्यान्वयनमा सकारात्मक प्रयासहरू भइरहे पनि नागरिकको अपेक्षालाई ठोस रूपमा सम्बोधन गर्न नसकिएको उहाँले स्वीकार गर्नुभयो। साथै, उहाँले सुदूरपश्चिमका जनताका विकास आकांक्षालाई पूरा गर्न प्रदेश सरकार प्रतिबद्ध रहेको प्रतिवद्धता व्यक्त गर्नुभयो।

कार्यक्रममा आन्तरिक मामिला तथा कानूनमन्त्री हिरासिंह पार्कीले स्वागत मन्तव्य दिनुभएको थियो भने, प्रदेश प्रमुख नजिर मियाँ, सभामुख भीमबहादुर भण्डारी, पूर्व मुख्यमन्त्रीहरू, मन्त्रीहरू, प्रदेशसभा सदस्यहरू, सुरक्षा अधिकारीहरू, र निजामती कर्मचारीहरूको उपस्थिति रहेको थियो।