भजनीमा आँखा शिविर सम्पन्न

राम नारायण चौधरी
भजनी, असोज १२। भजनी नगरपालिका र गेटा आँखा अस्पतालको आयोजनामा, नेपाल रेडक्रस सोसाइटी भजनी उपशाखा तथा भजनी उपशाखाअन्तर्गतका जुनियर रेडक्रस र युवा रेडक्रसका विद्यार्थीहरूको सहयोगमा आँखा शिविर कार्यक्रम सम्पन्न भएको छ। भजनी प्राथमिक स्वास्थ्य केन्द्रमा सञ्चालन गरिएको उक्त शिविरमा ८२६ जनाको आँखा परीक्षण गरिएको छ, जसमा ४८२ जना महिला र ३४४ जना पुरुष रहेका छन्।

शिविरमा ८८ जनाको आँखा शल्यक्रिया सफलतापूर्वक सम्पन्न भएको छ भने बाँकी २७ जनाको शल्यक्रिया भोलि बिहान गरिने जानकारी प्राप्त भएको छ।

यस प्रकारका शिविरहरूले स्थानीय बासिन्दालाई स्वास्थ्य सेवामा सहज पहुँच उपलब्ध गराउँदै आएको बताइएको छ। शिविरको सफलताका लागि नेपाल रेडक्रस सोसाइटीका स्वयम्सेवकहरूको सक्रिय सहयोग रहेको थियो।