ई-घोडाघोडी खबर

७ जेष्ठ २०८१

  • अमरगढी ढुङ्गे किल्ला संरक्षणमा सेना

    अमरगढी ढुङ्गे किल्ला संरक्षणमा सेना

    Share

     डडेलधुरा जिल्ला सदरमुकाम खलङ्गामा रहेको ऐतिहासिक ढुङ्गे अमरगढी किल्लाको संरक्षणमा नेपाली सेनाले चासो देखाएको छ । अमरगढी नगरपालिका–५, खलङ्गामा अवस्थित सो किल्ला छ हजार ५०० फिट उचाइमा रहेको छ ।

    सो किल्ला ढुङ्गा, माटोसँगै काठले बनेको छ । यसको सिंहको टाउकोको आकार जस्तो छ । श्री ५ रणबहादुर शाहको शासनकाल सन् १८४७ भाद्र ३१ गते नेपाल एकीकरणको सिलसिलामा डोटेली राज्यको नारीदाङमा युद्ध भएपछि विशाल डोटी राज्य नेपाल अधिराज्यमा गाभियो भन्ने इतिहास पाइन्छ ।

    नारीदाङमा कप्तान रणवीर खत्रीको नेतृत्वमा आएको १० कम्पनीका सैनिक जवान र डोटेली राज्यसँग घमासान युद्ध भएको इतिहास छ । युद्धमा गोरखाली फौजसँग डोटेली फौज पराजित भइसकेपछि यस भूभागको सुशासनलाई सुदृढ र विस्तार गर्न बडाकाजी अमरसिंह थापा प्रथम प्रशासकका रूपमा आउनुभएको बताइन्छ ।

    उहाँले यस क्षेत्रको संरक्षणसँगै महाकाली नदीपारि पश्चिम काँकडासम्म विजय अभियानलाई जारी राख्नुभएको थियो । सोही कालमा यस ढुङ्गे किल्लाको निर्माण गरिएको बताइन्छ । १८ औँ शताब्दीको जीवन्त इतिहास बोकेको ढुङ्गे किल्ला हाल जीर्ण हँुदै गएको छ ।

    किल्लाको संरक्षण, प्रवर्धन सुधार तथा स्तरोन्नतिका लागि नेपाली सेना अग्रसर भएको छ । अमरगढी नगरपालिका–१, दहमा रहेको सेनाको रणबम गणका गणपति एवं प्रमुख सेनानी प्रवीण थापाले संरक्षणका सम्बन्धमा छलफल अगाडि बढाउनुभएको छ । अमरगढी नगरपालिकाले आर्थिक वर्ष २०७७/७८ मा पाँच लाख रुपियाँ खर्च गरेर विस्तृत अध्ययन प्रतिवेदन तयार पारेको भिडियो प्रदर्शन गर्दै सुझाव सङ्कलन गरिएको छ । सो प्रतिवेदन अनुसार किल्लाको निर्माणको लागि करिब साढे सात करोड रुपियाँ आवश्यक पर्ने देखिएको छ ।

    सुदूरपश्चिम प्रदेश सभा सदस्य सरस्वती खड्काले किल्लाको विकासका लागि बजेट अभाव नहुने बताउनुभएको छ । स्थानीय बुद्धिजीवी, राजनीतिक दल, जनप्रतिनिधि, कर्मचारी, नागरिक समाजका अगुवाले किल्लाको संरक्षणमा एकजुट हुन जरुरी भएको औँल्याएका छन् ।

    ई-घोडाघोडी खबर

    सुचना तथा संचार मन्त्रालय,
    दर्ता नं. : 071/72/770,
    पान नं.: 602780247

    घोडाघोडी खबर टिम

    प्रवन्धक : स्वरूप चौधरी

    सम्पादक : इन्दु के. सी.

    बजार व्यवस्थापक : कालु राम चौधरी

    प्राविधिक प्रमुख/सह-सम्पादक : टेकु क्षेत्री