ई-घोडाघोडी खबर

७ जेष्ठ २०८१

  • किसानलाई धान भित्र्याउन समस्या

    किसानलाई धान भित्र्याउन समस्या

    Share

     खराब मौसमका कारण कैलालीका किसानलाई धान भित्र्याउन समस्या भएको छ । खेतमा धान पाकेको बेला मनसुन फेरि सव्रिmय भएपछि समस्या भएको गुनासो किसानको छ ।

    जिल्लाका सबै क्षेत्रमा धानबाली पाकेर काट्ने बेला भएको छ तर पानी पर्न थालेपछि  ढुक्क भएर धान काट्न र भित्र्याउन समस्या भएको छ । कतिपय किसानले भने जोखिम मोलेर धान काटिसकेका छन् ।

    दुई/तीन दिनअगाडि घाम लाग्दा धेरै जसो किसानले धान काटेका थिए । पानी पर्ने कुरा सुनिएपछि हतारमा थ्रेसिङ गरेर भित्र्याएका छन् । एक बिघामा लगाइएको धान काटेर हतार हतार भित्र्याएको धनगढी उपमहानगरपालिका–७, मनहेराका कृषक भज्जी रानाले बताउनुभयो । “पानी पर्ने डरले अरू खेतको धान काटेका छैनौँ,” उहाँले भन्नुभयो, “पानी नआएको भए अहिलेसम्म आधा धान काटेर सकिन्थ्यो ।” केही दिनअगाडि आएको हावापानीले कतिपय किसानको पाकेको धानबाली ढलाइदिएको छ ।

    ढलेको धान कसैले काटिसकेका छन् भने कसैको खेतमा पानी भएका कारण काटेका छैनन् । ढलेको धान काट्न नपाउँदै फेरि पानी पर्न थालेकाले खेतमै धान उम्रिने चिन्ता बढेको कैलारी गाउँपालिका–७ का कृषक फूलराज चौधरीले बताउनुभयो ।

    केही दिन धान नकाट्न आग्रह

    “ढलेको धान आजै काट्न गएका थियौँ,” उहाँले भन्नुभयो, “तर खेत पुग्ने बित्तिकै पानी पर्न थाल्यो, नकाटी फर्कियौँ । पाकेको धान काट्न पाएनौँ भने खेतमै उम्रिन्छ ।” असोज १७ सम्म पानी पर्ने सम्भावना रहेको भन्दै धनगढी उपमहानगरपालिकाले नगर क्षेत्रका किसानलाई धान नकाट्न सचेत गराएको छ ।

    उपमहानगरपालिकाले मोबाइलमा एसएमएस पठाउँदै धान काट्न केही दिन पर्खन आग्रह गरेको छ । यसै गरी काटिसकेको धान भित्र्याउन पनि सो कार्यालयले किसानलाई आग्रह गरेको छ ।

    कृषि ज्ञान केन्द्रका अनुसार कुल ८९ हजार ९३५ हेक्टर कृषियोग्य जमिन रहेको यो जिल्लामा ६९ हजार हेक्टर जमिनमा बर्खे धान खेती गरिएको छ । यस वर्ष बाढीले नबिगारेका कारण कैलालीमा धान उत्पादन राम्रो हुने जनाइएको छ ।

    ई-घोडाघोडी खबर

    सुचना तथा संचार मन्त्रालय,
    दर्ता नं. : 071/72/770,
    पान नं.: 602780247

    घोडाघोडी खबर टिम

    प्रवन्धक : स्वरूप चौधरी

    सम्पादक : इन्दु के. सी.

    बजार व्यवस्थापक : कालु राम चौधरी

    प्राविधिक प्रमुख/सह-सम्पादक : टेकु क्षेत्री