बैतडी कारागारबाट चार कैदी रिहा

बैतडी कारागारबाट चार कैदीबन्दी रिहा भएका छन्। संविधान दिवसको अवसरमा जिल्ला कारगार बैतडीमा कैदीबन्दी जीवन बिताइरहेका चार जनाको कैद मिनाहा भएको हो।

५० प्रतिशत कैद भुक्तान गरिसकेका, असल चालचलन भएका कैदीबन्दीहरुको कैदा मिनाहा भएको जिल्ला कारागार बैतडीकी प्रमुख धारा भण्डारीले बताइन्। जिल्ला कारागारले पाँच जना कैदीबन्दीको बाँकी कैद मिनाहाका लागि सिफारिस गरेको भएपनि चार जनाको मात्रै बाँकी कैद मिनाहा भएको हो।

कैद मिनाहा हुनेमा बझाङको बित्थडचीर गाउँपालिका–७ का बिर्खु भनिने बिर्ख लुहार, बैतडीको दोगडाकेदार गाउँपालिका–१ का धनबहादुर कार्की, दशरथचन्द नगरपालिका–६ का खेमराज महर र पाटन नगरपालिका–६ का रमेश बिष्ट रहेका छन्। बिर्ख लुहारलाई डाँकाचोरी मुद्दामा २०७७ साल असार २ गते ५ बर्षका लागि सजाय तोकिएको थियो। उनले ३ बर्ष ३ महिना कैद भुक्तान गरिसकेका छन्।

यस्तै डाँकाचोरी मुद्दामै २०७८ साल असार २४ गते ३ बर्ष सजाय तोकिएका धनबहादुर कार्कीले २ बर्ष २ महिना कैद भुक्तान गरिसकेका छन्। नकबजनी चोरी मुद्दामा २०७८ मंसिर १९ गते ३ बर्ष सजाय तोकिएका खेमराज महरले एक बर्ष ९ महिना कैद भुक्तान गरिसकेका छन्। सवारी ज्यान मुद्दामा २०७८ फागुन ९ गते तीन बर्ष सजाय तोकिएका रमेश बिष्टले एक बर्ष ६ महिना कैद भुक्तान गरिसकेका छन्।