‘निन्द नइ लग्ना’ थारु म्युजिक भिडियो सार्वजनिक

कैलाली । सुलभ फिल्मस् प्रालिले नयाँ थारु म्युजिक भिडियो ल्याएको छ ।
‘निन्द नइ लग्ना’ भन्ने बोलको गीतको म्युजिक भिडियोमा मोडल जगत गुरु र सामु चौधरीको मुख्य भूमिका रहेको छ । शब्द संगीत उमेश मुस्कानको रहेको गीतमा चर्चित गायिका अन्नु चौधरी र उमेश मुस्कानको स्वर दिएका छन् । म्युजिक भिडियोको डाइरेक्सन आर्दश महतोको रहेको छ । त्यसैगरि क्यामेरा र एडिट दया चौधरीको रहेको छ ।
यसैबिच प्रालिले धनगढीमा भिडियो रिलिज सेरेमनीको आयोजना गरेका थियो । प्रालीका प्रवन्ध निर्देशक दया चौधरीको अध्यक्षतामा भएको कार्यक्रमका प्रमुख अतिथी राष्ट्रिय थारु कलाकार मञ्च सुदूरपश्चिमका अध्यक्ष संगत थारु रहेका थिए । थारु मेगा स्टार समेत रहेका थारुले नयाँ नयाँ थारु म्युजिक भिडियो आउनु भनेको थारु समुदायको लागि एकदमै राम्रो रहेको बताए । उनले थारु म्युजिक भिडियोले थारु कला संस्कृति संरक्षणमा समेत टेवा पुग्ने बताए ।

एक अर्को प्रसङ्गमा उनले थारु गायक तथा संगीतकारहरुबाट म्युजिक भिडियोमा लगानी गर्ने लगानीकर्ता पीडित रहेको औँल्याए । उनले गायक तथा संगीतकारहरुले अडियोको व्यापार समेत गरेको आरोप लगाए ।
उनले भने‘–हामी म्युजिक भिडियो निर्माताहरुले गायक तथा संगीतकारहरुबाट लाखौँ लगाएर गीत(अडियो) किन्छौ, अझै त्यसमा लाखौँ लगानी गरेर म्युजिक भिडियो निर्माण गर्छौ । तर गायक तथा संगीतकारहरुले त्यही गीतलाई डिजिटल प्लेटफर्ममा आफ्नो नाममा दर्ता गर्छन् । जसले गर्दा हाम्रो निर्माण गरेको भिडियोमा कपीराइट आउनुका साथै हामी लगानी कर्ताहरुको लगानी नै डुब्ने गर्छ ।
कार्यक्रममा सुप कला प्रतिष्ठानका महासचिव गुणाकर पनेरु, वरिष्ठ द्वन्द निर्देशक उदयसिंह बोहरा, निर्देशक राजकुमार श्रेष्ठ, सुपक थारु सलिमा पहुराका गोविन्द मुखिया, कलाकारहरुको उपस्थिति रहेको थियो ।
कार्यक्रमका सञ्चालन थारु लोक गायक राजु राज चौधरीले गरेका थिए ।