दिल्लीमा लुकेर सामाजिक सञ्जालमा भ्रम फैलाउने बैतडीका प्रकाश चन्द जातीय विभेद मुद्दामा दोषी, प्रहरीको फरार सूचीमा

बैतडी । जिल्ला अदालत बैतडीबाट जातीय विभेदको कसुरमा दोषी ठहर भई ४ महिनाको कैद सजाय सुनाइएका प्रकाश चन्द भारतको दिल्ली गुडगावस्थित बजाज कम्पनीमा बसेर सामाजिक सञ्जालमा भ्रम फैलाउँदै आएका छन् । जता जहाँ गए पनि विवादास्पद क्रियाकलाप गर्ने उनी घरपरिवारको नजरमा समेत घृणित सदस्यका रूपमा सावित भएका छन् ।
दिल्लीमा बसेर प्रकाशले बैतडीका अधिकांश जनप्रतिनिधिहरू — विशेषगरी पञ्चेश्वर गाउँपालिकाका जनप्रतिनिधिहरूको बढी विरोध गर्दै सामाजिक सञ्जालमार्फत भ्रम फैलाउँदै आएका छन् । उनले बैतडीका एक दलित वडाध्यक्षलाई जातीय रूपमा होच्याउनुका साथै तथानाम गालीगलौज गरेपछि उनीविरुद्ध जातीय विभेदको कसुरमा मुद्दा दायर गरिएको थियो । हाल प्रकाश चन्द प्रहरीको फरार सूचिमा छन् ।
बैतडीको पञ्चेश्वर गाउँपालिका–०४, अनमखेत स्थायी घर भएका चन्द हाल दिल्लीमा बस्दै आएका छन् । वि.स २०५४ सालमा एसएलसी पास गरी उच्च शिक्षाका लागि महेन्द्रनगर पुगेका हुन । उनी बैतडीकै एक व्यवसायीको महेन्द्रनगरस्थित घरमा डेरा लिएर बसेका प्रकाशले घरभेटीकै कान्छी श्रीमती ४२ वर्षीया केशरी (नाम परिवर्तन) सँग अनैतिक सम्बन्ध राख्यो ।
उक्त कुरा जेठी श्रीमतीसँग काठमाडौंमा बस्ने घरभेटीले थाहा पाएपछि कान्छीको नाममा रहेको घर बेचिदिए भने, चोरी र लुटपाटको अभियोगमा प्रकाशविरुद्ध प्रहरीमा उजुरी दिए । तर, त्यतिबेला माओवादी जनयुद्ध उत्कर्षमा रहेकाले प्रहरीले पक्राउ भने गर्न सकेन । त्यसपछि प्रकाश र केशरीले भूमिगत शैलीमा बागफाटा स्थित ५ कट्ठा जमिन किनेर खेतीपाती सुरु गरे ।
उनले मुद्दाबाट बच्नका लागि कञ्चनपुर जिल्लाबाट ‘प्रकाश धामी’ नामको दोहोरो नागरिकता समेत लिएको स्रोतको दावी छ ।
खेतीपाती गर्दै कञ्चनपुरको बागफाटामा बस्दै जाँदा प्रकाश र केशरी दुबैलाई रक्सीको लत लाग्यो । लत यति हदसम्म पुग्यो कि पैसा सकिएपछि घरेलु मदिरा बनाएर खान थाले । ठूलो ऋण लागेपछि तिर्नका लागि ५ कट्ठा जमिन बेचिदिए र दुवैजना भारत पसेका हुन् । दिल्लीमा केही समय होटेलमा काम गरेपछि हालसम्म दिल्लीको गुडगावस्थित बजाज कम्पनीमा ‘टुल टेक्निसियन’को रूपमा काम गर्दै आएका छन् ।
उनको फेसबुक आइडीमा भने उनले आफूलाई ‘सफ्टवेयर इन्जिनियर’ भनेर उल्लेख गरेका छन् । तर, १२ कक्षा पनि पास नगरेका प्रकाशका कागजात नक्कली भएको उनलाई नजिकबाट चिनेका व्यक्तिहरू बताउँछन् ।
उनी अहिले थुप्रै फेक आइडी बनाएर दिल्लीबाट बैतडीका जनप्रतिनिधिहरूलाई गाली गर्ने र भ्रामक सामग्रीहरू सामाजिक सञ्जालमा पोस्ट गर्दै आएका छन् ।
जनयुद्धकै समयमा एक पटक प्रकाशको खोजी गर्न उनका बुबा महेन्द्रनगरको बागफाटा पुगेका थिए । बुबा खेतिपातिमा सघाउन पनि थालेका थिए । एकदिन वर्षाको मौसममा बिहानै खेतमा काम गरिरहेको देखेपछि छिमेकीले “यी को हुन् ?” भनेर सोध्दा प्रकाशले जवाफ दिएका थिए — “गाउँबाट नोकर बोलाएका हौँ ।”
बुबालाई ‘नोकर’ भनेर चिनाएपछि तत्कालै बुबा झोला समातेर घर फर्किए । त्यस दिनदेखि बाउछोराबीच बोलाचाल र भेटघाट बन्द भयो । उनका बुबाले अहिले “छोरा मरेको हो” भनी मान्ने गरेका छन् ।
उक्त मुद्दामा दोषी ठहर भई ४ महिनाको कैद सजाय तोकिएका उनी हाल प्रहरीको फरार सूचीमा रहेका छन् । उनलाई ‘इन्टरपोल’ प्रक्रिया मार्फत नेपाल ल्याएर जेल हाल्ने तयारी भइरहेको स्रोतले जनाएको छ ।