हावाहुरीले बाजुरामा जनजीवन प्रभावित, घर र विद्यालयमा व्यापक क्षति

शेरबहादुर सार्की
बाजुरा, जेठ ९ गते । बाजुरामा शुक्रबार राति चलेको हावाहुरीका कारण घर, गोठ, छाना तथा विद्यालयमा ठुलो क्षति भएको छ । शुक्रबार राति पानीसँगै चलेको हावाहुरीले बडीमालिकाको राप्का, बुढीगङ्गाको झाडी, देवलसैन, सिगाडा, नुवकोट तथा गौमुल गाउँपालिकाका अधिकांश स्थानीयका घरका छाना र विद्यालयका बालकक्षाको भवनमा जडान गरिएको कर्कटपाता उडाउँदा ठुलो क्षति पुगेको हो ।

बुढीगङ्गा नगरपालिका–८ देवलसैनका स्थानीय शिक्षक जगत रावलले शुक्रबार बेलुकी चलेको हावाहुरीका कारण घर तथा प्रारम्भिक बालकक्षाको भवनमा ठुलो क्षति भएको बताउनुभयो ।

उहाँले भन्नुभयो, “यतिबेला गर्मी छ, पानी पनि पर्ने गरेको छ । त्यसमाथि घर तथा विद्यालयको छाना उडाउँदा स्थानीय तथा साना बालबालिकालाई घर र कक्षाकोठामा बस्न समस्या भएको छ ।”

आर्थिक अवस्था कमजोर भएकाहरूले समयमै घर निर्माण गर्न नसकेको भन्दै उनीहरूको अवस्थालाई मध्यनजर गर्दै सरकारले समयमै राहत उपलब्ध गराउनुपर्ने रावलको भनाइ छ ।

बाजुराका हिमाली, स्वामीकार्तिक खापर, जगनाथ, बुढीनन्दा, बडीमालिका, गौमुल, बुढीगङ्गा, त्रिवेणी र खप्तड छेडेदह लगायतका अधिकांश घरमा पछिल्लो समय कर्कटपाताले छाना छाइएका छन् । चैत, वैशाख र जेठ महिनामा चल्ने हावाहुरीले प्रायः यसरी कर्कटपाताले छाएका घरका छानामा ठूलो क्षति पुर्‍याउने गरेको छ ।

जिल्ला प्रहरी कार्यालय बाजुराका सूचना अधिकारी गगनसिंह भाटले हिजो राति चलेको हावाहुरीले बुढीगङ्गा, बडीमालिका, गौमुल लगायतका क्षेत्रमा घरका छाना उडाएको भए पनि मानवीय क्षति नभएको बताउनुभयो ।

उहाँले भन्नुभयो, “कहाँ–कति क्षति भएको छ भन्ने बुझ्न प्रहरी टोली अहिले प्रभावित क्षेत्रमा जाने तयारीमा छ ।” टोली पुगेपछि मात्रै वास्तविक क्षतिको विवरण संकलन हुने सूचना अधिकारी भाटले बताउनुभयो ।