भीमदत्त नगरपालिकाले मात्रै इन्धनमा खर्चियो २ करोड ८७ लाख

बेलौरी (कञ्चनपुर), असार ५  गते । कञ्चनपुरका स्थानीय तहले मनोमानी ढङ्गले बर्सेनि लाखौँ रुपियाँ इन्धन शीर्षकमा खर्च गर्ने गरेका छन् । महालेखा परीक्षकको कार्यालयले सार्वजनिक गरेको आर्थिक वर्ष २०८१/८२ को लेखा परीक्षण प्रतिवेदनले यहाँका आठ स्थानीय तहले मितव्ययिता कायम नगरी सात करोड १६ लाख ९८ हजार रुपियाँ इन्धन शीर्षकमा खर्च गरेको जनाएको छ । महालेखा परीक्षकको कार्यालयको प्रतिवेदन अनुसार यहाँका स्थानीय तहले सवारीसाधन मर्मतका लागि छुट्टै मर्मत केन्द्र सञ्चालन नगर्दा तथा लागत अनुमान स्वीकृत नगराई मर्मतमा सोझै रकम भुक्तानी गरिँदा फजुल खर्च बढेको पनि जनाएको छ ।

जिल्ला सदरमुकामस्थित भीमदत्त नगरपालिकाले भने आव २०८१/८२ मा इन्धन शीर्षकमा अत्यधिक खर्च गरेको छ । सो पालिकाले इन्धन खर्चमा मात्रै दुई करोड ८७ लाख ८६ हजार १६५ रुपियाँ खर्च गरेको प्रतिवेदनमा उल्लेख छ । करिब तीन सय कर्मचारी रहेका भीमदत्त नगरपालिकाले अर्थ मन्त्रालयबाट जारी निर्देशिका अनुसार प्रतिकर्मचारीलाई मासिक १० लिटरसम्म इन्धन उपलब्ध गराउन सकिने व्यवस्था छ तर पदाधिकारी, कर्मचारी तथा सार्वजनिक निर्माणमा खपत भएको इन्धन उपयोगको विवरण खुल्ने अद्यावधिक अभिलेख भने राखेको छैन । यसका साथै नगरपालिकाले प्रतिस्पर्धा कायम नगरीकनै सो आवमा सवारी मर्मत शीर्षकमा ३५ लाख ५२ रुपियाँ भुक्तानीसमेत गरेको छ ।

वेदकोट नगरपालिकाले आव २०८१/८२ मा इन्धन शीर्षकमा ६७ लाख ५६ हजार ९८८ रुपियाँ खर्च गरेको छ तर सवारीसाधन प्रयोग गर्ने पदाधिकारीले प्रयोग गरेको इन्धनको अभिलेख र सवारीसाधनले खपत गर्ने इन्धनको मापदण्ड तयार नगरिँदा इन्धन खर्चको वस्तुगत परीक्षण गर्न सकिने अवस्था नरहेको महालेखा परीक्षकको कार्यालयले औँल्याएको छ । दोधारा चाँदनी नगरपालिकाले कार्यालय प्रयोजनमा ४३ लाख ५२ हजार ६२९ रुपियाँ, (इन्धन) पदाधिकारीमा २० लाख र इन्धन अन्य प्रयोजनमा दुई लाख गरी ६५ लाख ५२ हजार ६२९ रुपियाँ खर्च गरेको महालेखाको प्रतिवेदनमा उल्लेख छ । यहाँ पनि इन्धन उपयोगको विवरण खुल्ने गरेर अद्यावधिक अभिलेख भने राखेको नपाइएको महालेखाले औँल्याएको छ । इन्धन खर्चको अभिलेखाङ्कनलाई व्यवस्थित बनाउनुका साथै खर्चमा मितव्ययिता अपनाउन महालेखा परीक्षकको कार्यालयले सुझाव दिएको छ । सो पालिकाले पनि मर्मत केन्द्र स्थापनाबिनै विभिन्न मर्मत केन्द्रलाई सवारी मर्मतमा सोझै ३४ लाख ९८ हजार ९८९ रुपियाँ भुक्तानी गरेको पाइएको महालेखा परीक्षकको प्रतिवेदनमा उल्लेख छ ।

लालझाडी गाउँपालिकाले आव २०८१/८२ मा इन्धन (पदाधिकारी) मा १२ लाख ६६ हजार १८ रुपियाँ र अन्य प्रयोजनमा २४ लाख छ हजार ६२२ गरी ३७ लाख ७२ हजार ६४० रुपियाँ खर्चेको छ तर गाउँपालिकाले भने पदाधिकारी, कर्मचारी तथा सार्वजनिक निर्माणमा खपत भएको इन्धन उपयोगको विवरण खुल्ने अद्यावधिक अभिलेखसमेत नराखेको पाइएको प्रतिवेदनमा उल्लेख छ । महालेखा प्रतिवेदनले इन्धन खर्चलाई सार्वजनिक सम्पत्ति व्यवस्थापन प्रणालीमा प्रविष्ट गरी इन्धन खर्चको अभिलेखाङ्कनलाई व्यवस्थित बनाउँदै यस्ता खर्चमा मितव्ययिता अपनाउन सुझाव दिएको छ ।

बेलडाँडी गाउँपालिकाले कर्मचारी प्रोत्साहन भत्ता इन्धन शीर्षकमा २४ लाख ९० हजार ३९२ रुपियाँ खर्चिएको छ । त्यसै गरी इन्धन कार्यालय प्रयोजनमा २२ लाख, अन्य इन्धन शीर्षकमा एक लाख १० हजार गरेर ४८ लाख ३९२ रुपियाँ खर्च गरेको छ । कृष्णपुर नगरपालिकाले कार्यालय प्रयोजनमा ५६ लाख २३ हजार ८८० रुपियाँ तथा इन्धन अन्य प्रयोजनमा ३५ लाख १५ हजार ६६८ रुपियाँ गरी ९१ लाख ३९ हजार ५४८ रुपियाँ इन्धन शीर्षकमा खर्च गरेको छ । कृष्णपुरले प्रतिस्पर्धाबिनै सवारी मर्मतमा ६९ लाख ३१ हजार ६१० रुपियाँ भुक्तानी गरेको प्रतिवेदनमा उल्लेख छ । बेलौरी नगरपालिकाले आव २०८१र८२ मा इन्धन शीर्षकमा ५० लाख रुपियाँ खर्च गरेको छ ।