युवाको आवाज नीति निर्माणमा समेट्न सरकार सकारात्मक : मुख्यमन्त्री शाह

चौमाला (कैलाली), जेठ १० गते  । सुदूरपश्चिम प्रदेशका मुख्यमन्त्री कमलबहादुर शाहले युवाको सहभागिता र नेतृत्वलाई बलियो बनाउन प्रदेश सरकार प्रतिबद्ध रहेको बताउनुभएको छ ।

धनगढीमा शनिबार सुरु भएको सुदूरपश्चिम प्रदेश युवा सम्मेलन २०२६ को उद्घाटन गर्दै मुख्यमन्त्री शाहले युवाका आवाज, योजना र मागलाई प्रदेश सरकारको नीति तथा कार्यव्रmममा समावेश गर्न प्रदेश सरकार सकारात्मक रहेको बताउनुभयो ।

आजका युवाले प्रविधिको प्रयोगमार्फत नयाँ चेतना र सम्भावनाको ढोका खोलेको बताउँदै उहाँले प्रविधिको दुरुपयोग र त्यसबाट सृजित चुनौतीले युवालाई असर गरिरहेको बताउनुभयो । उहाँले डिजिटल युगमा युवालाई अवसरसँगै सचेतना आवश्यक रहेको उल्लेख गर्नुभयो ।

मुख्यमन्त्री शाहले अहिले सङ्घीय संसद् तथा विभिन्न तहमा युवाको प्रतिनिधित्व बढ्दै गएको उल्लेख गर्दै विगतमा युवाको क्षेत्रमा हुन नसकेका काम अब अगाडि बढ्ने विश्वास व्यक्त गर्नुभयो ।

युवा डिजिटल स्पेसका लागि एकजुट भन्ने मूल नारासहित सुरु भएको दुई दिने सम्मेलनमा सुदूरपश्चिमका नौ वटै जिल्लाबाट युवाको सहभागिता रहेको छ ।

सम्मेलनमा डिजिटल नागरिकता, युवा नेतृत्व, नीति निर्माणमा युवाको सहभागिता तथा नागरिक सहभागी सुदृढीकरणका विषयमा छलफल भइरहेको छ ।

बागमती प्रदेशपछि सुदूरपश्चिममा युवा सम्मेलन आयोजना गरिएको छ । आगामी दिनमा कर्णाली प्रदेशसहित देशका अन्य प्रदेशमा पनि राष्ट्रिय युवा सम्मेलन आयोजना गरिने आयोजकले जानकारी दिएको छ ।

गैरसरकारी संस्था महासङ्घका केन्द्रीय उपमहासचिव किरण थापाले प्रदेश सम्मेलनबाट उठेका सुझाव, माग र निष्कर्षलाई एकीकृत गर्दै सुदूरपश्चिम घोषणापत्र सार्वजनिक गरिने बताउनुभयो । उहाँले घोषणा पत्रमार्फत युवाका मुद्दालाई नीति निर्माण तहसम्म पु¥याउने लक्ष्य रहेको उल्लेख गर्नुभयो ।

गैरसरकारी संस्था महासङ्घ सुदूरपश्चिम प्रदेशका अध्यक्ष देवीप्रसाद खनालको अध्यक्षतामा कार्यक्रम भएको थियो ।