टीकापुर, भदौ २१ गते। कृषि सामग्री कम्पनीले सहकारीलाई सहुलियतमा उपलब्ध गराएको रासायनिक मल फरक फरक मूल्यमा बेचिँदा किसानहरू ठगिएको गुनासो गर्दै आएका छन्। सहकारीहरूले विभिन्न नाफा राखेर मल बिक्री गरिरहेका छन्, जसका कारण एउटै वडामा पनि मलको मूल्य फरक पाइएको छ।
सहकारीहरूले कृषि सामग्री कम्पनीबाट युरियाको ५० किलोको बोरालाई ९३६ रुपियाँ ५० पैसामा खरिद गरी उपभोक्तालाई एक हजार एक सयदेखि एक हजार दुई सय रुपियाँसम्मको दरमा बिक्री गरिरहेका छन्। सहकारीहरूले खरिद मूल्यमा ढुवानी, लोड अनलोड र अन्य खर्चहरू थपेर मूल्य निर्धारण गरिरहेको बताएका छन्। कृषि सामग्री कम्पनीले प्रतिटन मलमा ४ सय रुपियाँ छुट दिएको भए पनि सहकारीहरूले थप नाफा राखेर बिक्री गरेका छन्।
जानकी गाउँपालिका–४, मुनुवास्थित कृषक बिज वृद्धि सहकारीले धनगढीबाट ल्याउँदा ढुवानी खर्च बढी लाग्ने र माग अनुसार मल उपलब्ध नहुँदा प्रतिकट्ठा एक हजार १२५ मा मल बेचिरहेको कृषक रामफल चौधरीले बताए। सोही वडामा रहेको पशुपति कृषि सहकारीले भने एक हजार दुई सयमा मल बिक्री गरिरहेको छ। पशुपति सहकारीका अध्यक्ष सोहनलाल कठरियाले समूहको सल्लाह अनुसार मूल्य निर्धारण गरिएको बताएका छन्।
टीकापुर नगरपालिका–१, वनगाउँस्थित नमुना कृषक बिज वृद्धि सहकारीले एक हजार १५० मा मल बेचिरहेको छ भने सोही वडामा रहेको किसान मल्टिप्रपोज प्रालिले प्रतिबोरा एक हजार दुई सय रुपियाँमा बिक्री गरिरहेको छ। जनता कृषि सहकारीलगायत अन्य सहकारीहरूले पनि एक हजार १५० भन्दा माथि मूल्य राखेर मल बेचिरहेका छन्। धनगढीबाट सबैभन्दा टाढा रहेको सामुदायिक सहकारी सत्तिले भने प्रतिबोरा एक हजार एक सयमा मल बेचिरहेको जानकारी व्यवस्थापक दीपककुमार वैद्यले दिएका छन्।
मलको अनुगमन नहुँदा सहकारीको नाममा ल्याइएको मल व्यापारीमार्फत बिक्री हुने र फुटकरमा प्रतिकिलो ३० रुपियाँ लिँदा किसानहरू मारमा परेका छन्। कृषि सामग्री कम्पनी लिमिटेड धनगढीका प्रमुख नवलसिंह बोगटीका अनुसार, सहकारीहरूले मूल्य निर्धारण गर्दा ढुवानी र लोड अनलोड खर्च मात्र थपेर कारोबार गर्नुपर्ने हो। उनले अनुदानको मल वितरणका लागि २०७७ सालमा बनाइएको निर्देशिकाले पालिकामा उपप्रमुख/उपाध्यक्षको संयोजकत्वमा तीन सदस्यीय समिति गठन गर्न भनेको भए पनि धेरै पालिकाहरूमा यो समिति सक्रिय नभएको बताए। किसानहरू विरोध गर्न डराउँछन्, किनकि उनीहरूलाई मल नै नपाइने डर छ।