धनगढी, कात्तिक ४ – नेपाल रानाथारु समाजको केन्द्रीय अध्यक्षमा कमलसिंह राना निर्वाचित भएका छन्। धनगढीमा सम्पन्न सातौं महाधिवेशनबाट उहाँले लोकप्रिय मतसहित अध्यक्ष पदमा जित हासिल गरेका हुन्।
अध्यक्षका लागि सात जनाको उम्मेदवारी परेकोमा कमलसिंह रानाका निकटतम् प्रतिद्वन्द्वी ओमप्रकाश रानाले मात्र १० मत प्राप्त गरेका थिए।
उपाध्यक्ष पदमा कन्दकला राना र डिठ्ठा राना निर्वाचित भए भने महासचिवमा तीर्थराज राना र सचिव पदमा साहेब राना तथा भजना राना विजयी भएका छन्। कोषाध्यक्षको पद चन्द्रकिरण रानाले हात पारेका छन्।
सदस्यहरूमा अम्लेस राना, गोदावरी राना, दानसिंह राना, रमित राना, लालमणि राना, शिवचरण राना, सरिता राना र सामु राना निर्वाचित भएका छन्।
कैलाली र कञ्चनपुरमा मुख्यत: बसोबास गर्ने रानाथारु समुदायको महाधिवेशनमा सर्वसम्मत कार्यसमिति चयन गर्ने प्रयास भए पनि सहमति जुट्न नसकेपछि निर्वाचनमार्फत नयाँ नेतृत्व चयन गरिएको हो।