धनगढी, कात्तिक ८ गते । चाडपर्वका अवसरमा दिइएको बिदालाई कैलालीका एक विद्यालयको छात्राले हस्तकलाको सिप सिकेर सदुपयोग गरिरहेका छन् । धनगढीस्थित पञ्चोदय माध्यमिक विद्यालयको छात्राले पुरानो लुगाबाट हाते झोला बनाएर बिदा सदुपयोग गरिरहेका हुन् । धेरै जसो विद्यार्थी बिदामा आआफ्ना अभिभावकसँग घुमघाम गर्दै रमाइरहेका बेला यो विद्यालयको कक्षा ९ र १० का केही छात्रा पुरानो कपडाबाट झोला बनाउनमा व्यस्त छन् ।
विशेष गरेर पुरानो पाइन्टबाट हाते झोला बनाउने काम गरिरहेको कक्षा १० मा अध्ययनरत छात्रा एलिना चौधरीले बताउनुभयो । विद्यालयमै झोला बनाउन उहाँले नै आफ्ना सहपाठीलाई सिकाउने कार्य गरिरहनुभएको छ । “हामीले पुरानो पाइन्टबाट हाते झोला बनाइरहेका छौँ,” चौधरीले भन्नुभयो, “यो हाते झोला तरकारी बोक्न र किनमेलसहित अन्य कामका लागि धेरै उपयोगी हुने गर्छ ।”
एलिनाले आफू अर्को विद्यालय पढ्ने बेला कागजको ब्याग बनाएको अनुभव सुनाउँदै पछि पुरानो जिन्स पाइन्ट काटेर हाते झोला बनाउन सिकेको उल्लेख गर्नुभयो । “मैले एउटा पाइन्ट काटेँ तर त्यसबाट के बनाउने भन्ने आइडिया आएको थिएन,” उहाँले थप्नुभयो, “पछि पाइन्टबाट झोला बनाउनु प¥यो भन्ने सोच आयो । मैले आफ्नो माइजूबाट अलिकति सहयोग लिएर पाइन्टको झोला बनाउन थालेँ ।” आफूले झोला बनाउन सिकेर आफ्ना साथीहरूलाई सिकाउन पाउँदा हर्षित भएको एलिनाको भनाइ छ ।
आगामी दिनमा विद्यालयका थप अन्य विद्यार्थीलाई झोला बनाउने सिप सिकाउने योजना रहेको विद्यालयले जनाएको छ । अरू विद्यार्थीलाई प्रशिक्षण दिन सक्ने एउटा कोर समूह तयार पार्ने उद्देश्यका साथ सुरुमा सात/आठ जना विद्यार्थीलाई राखेर झोला बनाउने प्रशिक्षण सञ्चालन गरेको विद्यालयका प्रधानाध्यापक हरिष ओझाले बताउनुभयो । “धेरै विद्यार्थीलाई राख्नुभन्दा सुरुमा हामीले सात/आठ जनाका लागि प्रशिक्षण कार्यक्रम सञ्चालन ग¥यौँ र विद्यालयमै अध्ययनरत छात्रा एलिनाले उनीहरूलाई सिकाइन्,” उहाँले भन्नुभयो, “आगामी दिनमा इच्छुक विद्यार्थीलाई यस्तो सिप सिकाउने योजना छ ।”
विद्यालयले सञ्चालन गरेको हस्तकला प्रदर्शनीमा एलिनाले पुरानो काम नलाग्ने पाइन्टको झोला बनाएर प्रदर्शनीमा राखेपछि उहाँको प्रतिभाको पहिचान भएको प्रअ ओझाको भनाइ छ । खेर जाने पुरानो कपडाबाट विद्यार्थीले बनाएको झोला विशेष अवसरमा उपहारका रूपमा पनि दिन सकिने उहाँले उल्लेख गर्नुभयो । “विद्यार्थीले पाइन्टको झोला बनाएपछि केहीले त्यसलाई किन्न पनि चाहेका थिए,” प्रअ ओझाले भन्नुभयो, “तर आआफ्ना आफन्त वा साथीहरूलाई जन्मदिनमा उपहारका रूपमा दिनु भनेर अहिलेलाई विद्यालयले झोला बनाउने सम्बन्धित विद्यार्थीलाई नै झोला दिएको छ ।” यो हस्तकलाको सिपबाट विद्यार्थीले आम्दानी गर्न सक्ने विद्यालयले जनाएको छ । आगामी दिनमा बढी झोला उत्पादन गर्न सकिएमा विभिन्न प्रदर्शनीमा राखेर विद्यार्थीले आफ्नो उत्पादन बिक्री, वितरण गर्न सक्ने ओझाले उल्लेख गर्नुभयो । हरियो, स्वच्छ र सफा नगर बनाउने अभियान सञ्चालन गरिएको धनगढीमा विगत तीन वर्षदेखि प्लास्टिक प्रयोग निषेध गरिएको छ । प्लास्टिकको झोला प्रयोग गर्न नपाइने भएका कारण धनगढीमा कपडाको झोलाको प्रयोग र माग बढ्दो छ ।