२ फागुन, धनगढी। कैलालीमा साढे चार किलो चरेससहित दुई जनालाई पक्राउ गरिएको छ । गौरीगंगा नगरपालिका र गोदावरी नगरपालिकाबाट शुक्रबार दिउँसो चरेससहित दुई जनालाई पक्राउ गरिएको प्रहरीले जनाएको छ ।

जिल्ला प्रहरी कार्यालयका प्रवक्ता प्रहरी नायब उपरीक्षक(डीएसपी) कबिन्द्र सिंह बोहराले पक्राउ पर्नेमा गौरीगंगा नगरपालिका–८ चमारीपुर बस्ने ५३ वर्षीया बेलमती बोहरा र बझाङको केदारस्यु गाउँपालिका–७ भान्चौरका ४६ वर्षीय घोडे धामी रहेको जानकारी दिए ।

उनकाअनुसार बोहरालाई बडैपुर र धामीलाई अत्तरियाबाट पक्राउ गरिएको हो । बोहराले बडैपुरमा सञ्चालन गरेको नास्ता पसलमा खाटमुनी कालो प्लाष्टिकमा लुकाएको अवस्थामा एक किलो ६६५ ग्राम चरेससहित पक्राउ गरिएको उनले बताए ।

यस्तै, बझाङका धामीलाई गोदावरी नगरपालिका–३ को चौकिडाँडाबाट पक्राउ गरिएको हो । मालाखेती अस्पताल जाने सडकमा हिडिरहेको अवस्थामा विशेष सूचनाका आधारमा धामीलाई २ किलो आठ सय ६० ग्राम चरेससहित पक्राउ गरिएको डीएसपी बोहराले बताए ।

धनगढी, माघ २९ गते । कैलाली प्रहरीले चितुवाको छालासहित एक व्यक्तिलाई पक्राउ गरेको छ ।

पक्राउ पर्नेमा डोटीको बोगटान गाउँपालिका–३ मेल्टाका २६ वर्षीय नरेश साउँद रहेका छन् । साउँदलाई धनगढी उपमहानगरपालिका–४ बसपार्कस्थित देवसिंह बोहराको मिलनसार गेस्टहासबाट पक्राउ गरेको जिल्ला प्रहरी कार्यालयले जानकारी दिएको छ ।

विशेष सूचनाको आधारमा खटेको प्रहरी टोलीले रितपूर्वक खानतलासी गर्दा साउँदले लुकाएर राखेको अवस्थाबाट आठ फिट दुई इन्च लम्बाई र दुई फिट दुई इन्च चौडाइ भएको एक थान चितुवाको छाला बरामद भएको जिल्ला प्रहरी कार्यालयका प्रवक्ता प्रहरी नायब उपरीक्षक कविन्द्रसिंह बोहराले जानकारी दिनुभयो ।

चितुवाको छालासहित पक्राउ परेका साउँदलाई थप अनुसन्धानका लागि डिभिजन वन कार्यालय धनगढीमा बुझाइएको छ ।

धनगढीः कैलालीमा माइक्रो बस (हाइस)को ठक्करबाट मोटरसाइकल चालक घाइते भएका छन्।

पूर्वपश्चिम राजमार्ग अन्तरगत गौरीगंगा नगरपालिका–४ को राजीपुरमा कर्णाली प्रदेश ०२००१८ प ०८५६ नम्बरको माइक्रो बसले सुदूरपश्चिम प्रदेश ०१०१२ प ५२६९ नम्बरको मोटरसाइकललाई ठक्कर दिएको प्रहरीले जनाएको छ। ठक्करबाट मोटरसाइकल चालक घोडाघोडी नगरपालिका–१ बस्ने २३ वर्षीय किशोर चौधरी गम्भीर घाइते भएका छन्।

चौधरीको टाउकोमा गम्भीर चोट लागेको छ। उनको घोडाघोडीमै उपचार भइरहेको छ। माइक्रो बस र चालक सुर्खेतको बिरेन्द्रनगर–६ बस्ने ३३ वर्षीय राजबहादुर थापालाई इलाका प्रहरी कार्यालय चौमालले नियन्त्रणमा लिएको छ।

धनगढी, माघ २६ गते । साझेदारी वन क्षेत्रबाट काठ चोरी गरेको आरोपमा कैलालीमा चार गोलिया काठसहित तीन जनालाई पक्राउ गरिएको छ ।

इलाका प्रहरी कार्यालयबाट खटेको प्रहरी र सव डिभिजन वन कार्यालय मसुरियाबाट खटेको वनकर्मीको संयुक्त टोलीले उनीहरुलाई पक्राउ गरेको हो । पक्राउ पर्नेमा गौरीगङ्गा नगरपालिका–७ मट्कौना पछलापट्टीका ५१ वर्षीय दिनेश चौधरी, ४१ वर्षीय निर्मल डङ्गौरा थारु र ५४ वर्षीय सीताराम चौधरी रहेका सुदूरपश्चिम प्रदेश प्रहरी कार्यालयले जानकारी दिएको छ ।

प्रहरीका अनुसार उनीहरुले गौरीगंगा साझेदारी वनबाट ५७.०८ क्युफिट काठ चोरी गरेर ल्याएका थिए । दिनेशको घरमा लुकाइछिपाइ राखेको अवस्थाबाट सालको चार गोलिया काठ बरामद गरिएको जनाइएको छ । पक्राउ परेकाहरुलाई आवश्यक कारबाहीका लागि सव डिभिजन वन कार्यालय मसुरियाको जिम्मा लगाएको प्रदेश प्रहरी कार्यालयले जानकारी दिएको छ ।

(धनगढी) कैलालीमा चितुवाको छालासहित एक जना पक्राउ परेका छन। जिल्लाको भजनी नगरपालिका–३ ठेकिपुरबाट चितुवाको छाला र १२ दाँतसहित बिहारे चौधरी पक्राउ परेका हुन्।

सुदूरपश्चिम प्रहरीले चौधरीलाई कालो प्लास्टिकको झोलाभित्र लुकाइ राखिएको अवस्थामा चितुवाको छाला र दाँतसहित नियन्त्रणमा लिएको बताएको छ। बरामद गरिएको छाला ४ फिट ४ इन्च लम्बाइ र १ फिट १० इन्च चौडाइको छ।

चौधरीमाथि वन्यजन्तु अपराधको अभियोगमा अनुसन्धान भइरहेको छ। नेपालमा वन्यजन्तुका अंगको अवैध व्यापार गैरकानुनी मानिन्छ।

भजनी नगरपालिका-९, पचमुदिया, कैलाली:
ओम शान्ति सामुदायिक वन उपभोक्ता समितिले चिसो मौसममा स्थानीय बासिन्दालाई राहत दिन भजनी नगरपालिका-९ पचमुदिया चोकमा आगो बाल्नका लागि दाउरा उपलब्ध गराएको छ।

समितिका अध्यक्ष राज कुमार चौधरीले चिसो बढेसँगै ग्रामीण क्षेत्रमा बसोबास गर्ने नागरिकहरूको दैनिक जीवनलाई सहज बनाउन यो कदम चालेको जानकारी दिए। “यो प्रयासले चिसोको प्रभावबाट बच्न सहयोग पुग्नेछ। बासिन्दाहरूको सुविधाका लागि यो व्यवस्था गरिएको हो,” उनले बताए।

स्थानीय बासिन्दाले यस कदमको सराहना गर्दै यसले उनीहरूलाई दैनिक कार्य गर्न सहज बनाएको उल्लेख गरेका छन्। चोकमा राखिएको दाउरा सामुदायिक प्रयोगका लागि उपलब्ध गराइएको छ, जसले सामूहिक भावना बढाउन मद्दत गर्ने विश्वास लिइएको छ।

यस प्रकारका सामुदायिक पहलकदमीले चिसो मौसममा ग्रामीण क्षेत्रमा देखिने कठिनाई समाधान गर्न सकारात्मक प्रभाव पार्ने अनुमान गरिएको छ।

धनगढी, मङ्सिर २३ गते । लागुऔषध खैरो हेरोइनसहित कैलाली प्रहरीले सात जनालाई पक्राउ गरेको छ । लागुऔषध नियन्त्रण ब्युरो, जिल्ला प्रहरी कार्यालय र मातहतका प्रहरी कार्यालयबाट खटेको प्रहरी टोलीले कैलालीको विभिन्न स्थानबाट उनीहरुलाई पक्राउ गरेको हो ।

पक्राउ परेका व्यक्तिहरुको साथबाट कुल ११ ग्राम ७३० मिलिग्राम लागुऔषध बरामद भएको जिल्ला प्रहरी कार्यालयले जानकारी दिएको छ । सो कार्यालयका अनुसार धनगढी उपमहानगरपालिका –४ भाटभटेनीनजिकबाट २७ वर्षीय रमेश भट्ट दुई ग्राम ४७० मिलिग्राम खैरो हेरोइनका साथ पक्राउ परेका छन् ।

यसैगरी, एक ग्राम ४० मिलिग्राम खैरो हेरोइनसहित प्रहरीले धनगढी उपमहानगरपालिका –७ का १८ वर्षीय राजेश राना, २५ वर्षीय रामगोपाल रानालाई पक्राउ गरेको छ । धनगढी उपमहानगरपालिका –१२ पानीघट्टनजिकबाट उनीहरुलाई पक्राउ गरिएको बताइएको छ ।

जानकी गाउँपालिका –९ खैरीफाँटाका १९ वर्षीय सचिन रावललाई तीन ग्राम ९८० मिलिग्राम खैरो हेरोइनसहित प्रहरीले पक्राउ गरेको छ । यसैगरी, धनगढी उपमहानगरपालिका –४ का २८ वर्षीय गोपाल रामजाली मगरलाई प्रहरीले ५१० मिलिग्राम लागुऔषधसहित पक्राउ गरेको छ । यातायात कार्यालयनजिक शङ्का लागेर जेकचाँज गर्दा उनको साथबाट लागुऔषध बरामद भएको जिल्ला प्रहरी कार्यालयले जानकारी दिएको छ ।

यस्तै, धनगढी उपमहानगरपालिका –८ संगमटोलका २८ वर्षीय सुरेश चौधरीलाई एक ग्राम ८४० मिलिग्राम खैरो हेरोइनसहित पक्राउ परेका छन् । पक्राउ परेका सबैमाथि अनुसन्धान कार्य जारी रहेको जिल्ला प्रहरी कार्यालयको सञ्चार शाखाका गणेश नाथले जानकारी दिनुभयो ।

धनगढी, मङ्सिर २३ गते । कैलालीमा प्रहरीले १० लाख ९१ हजार मूल्य बराबरको भन्सार छलीको सामान बरामद गरेको छ । जिल्ला प्रहरी कार्यालय र मातहतको प्रहरी चौकीबाट खटेको प्रहरी टोलीले भन्सार छलीको सामान बरामद गरेको हो ।

जिल्ला प्रहरी कार्यालयका अनुसार धनगढीस्थित ट्राफिक चौराहा र बोराडाँडीबाट अन्दाजी १० लाख ५३ हजारको बराबरको विभिन्न मोबाइलका कभर र किरानाको सामान बरामद गरिएको छ ।

यसैगरी, गोदावरी नगरपालिकाको बालुवाटारबाट अन्दाजी ३८ हजार मूल्य बराबरको स्पिकर, पम्पको वासर बरामद भएको जिल्ला प्रहरी कार्यालयका सह प्रवक्ता प्रहरी निरीक्षक दर्शन खड्काले जानकारी दिनुभयो ।

घोडाघोडी (कैलाली), मङ्सिर ९ गते । कैलालीको घोडाघोडी नगरपालिकामा दुई युवतीले झुण्डिएर आत्महत्या गरेका छन् । फरक–फरक स्थानमा भएको आत्महत्याको कारण भने खुलेको छैन ।

घोडाघोडी नगरपालिका –७ कीर्तिपुर बस्ने १६ वर्षीय भावना बोहरा आइतबार झुण्डिएको अवस्थामा फेला परेकी छन् । इलाका प्रहरी कार्यालय सुखडका प्रहरी निरीक्षक डिबी साउँदले घरनजिक जङ्गलको किनारमा घाँटीमा पासो लगाएर रुखमा झुण्डिएको अवस्थामा फेला परेको  जानकारी दिनुभयो ।

कक्षा ८ मा अध्ययनरत बोहरा तीन पटकसम्म फेल भएको परिवारबाट बुझिए पनि आत्महत्याको कारण भने खुल्न नसकेको प्रारम्भिक अनुसन्धानबाट बुझिएको प्रहरीको भनाइ छ ।

त्यसैगरी घोडाघोडी नगरपालिका वडा ५ वनखेत बस्ने २१ वर्षीय सबिता चौधरीले झुण्डिएर आत्महत्या गरेकी छन् । आफ्नै घरमा शनिबार दिउँसो झुण्डिएर आत्महत्या गरेको परिवारका सदस्यहरुको भनाइ छ । चौधरीको आत्महत्याको कारण खुलेको छैन । विवाहित चौधरीको घर र माइती पक्षबाट पनि आत्महत्याको कारण बारे खुलेको छैन ।

धनगढीः घोडाघोडीमा विवाहमा एक किशोरमाथि कुटपिट भएको छ।

कुटपिटबाट एक जना घाइते भएका छन भने ४ जना पक्राउ परेका छन्। हिजो (शनिबार) घोडाघोडी नगरपालिका–७ का ओमबहादुर चिमालाको छोराको विवाहमा रमाइलो गर्ने क्रममा १५ वर्षीय अंकित गौतममाथि कुटपिट भएको हो। कुटपिटबाट उनको टाउँकोमा चोट चोट लागेको छ।

सामुहिक कुटपिटबाट घाइते भएका अंकितको निसर्ग अस्पताल धनगढीमा उपचार भइरहेको छ। किशोरमाथि कुटपिटको आरोपमा चार पक्राउ परेका छन्। घोडघोडी नगरपालिका–७ का २३ वर्षीय आकाश विक, २९ वर्षीय मोहन बम, २२ वर्षीय तारेशु बोहरा र २७ वर्षीय दुर्गा पुनामीमगरलाई नियन्त्रणमा लिएको जिल्ला प्रहरी कार्यालय कैलालीका प्रवक्ता एवं प्रहरी नायब उपरीक्षक कबिन्द्रसिंह बोहराले बताए।

विवाहमा कुटपिट भएपछि त्यहाँ प्रहरी खटिएको थियो। कुटपिटमा संलग्न समुहलाई प्रहरीले सम्झाउन खोज्दा उल्टै प्रहरीमाथि नै हातपात गर्न खोजिएको डिएसपी बोहराले बताए। कुटपिटमा संलग्न पक्राउ परेका चारै जनालाई इलाका प्रहरी कार्यालय सुखडले नियन्त्रणमा लिएर थप अनुसन्धान गरिरहेको छ।