दुई सातादेखि चामल अभाव रहेको खाद्य व्यवस्था तथा व्यापार कम्पनी मार्तडीमा शनिबार दुई सय क्विन्टल चामल ढुवानी गरिएको छ । कम्पनीको हिमाली गाउँपालिकाको कवाडी र स्वामीकार्तिक खापर गाउँपालिकाको मुक्तिकोट बिक्री केन्द्रमा भने अझै चामल अभाव छ ।

खाद्य व्यवस्था तथा व्यापार कम्पनी लिमिटेड बाजुराका प्रमुख मेखराज ओझाले शनिबार पहिलो चरणमा मार्तडी डिपोमा दुई सय क्विन्टल जिरा मसिनो चामल ढुवानी गरिएको जानकारी दिनुभयो । जिल्लाको खाद्य डिपोमा नियमित आउने अनुदानको चामल ठेक्का प्रक्रिया पूरा नहुँदै चामल सकिएपछि ढुवानी भाडा पछि स्वीकृत हुने गरी तत्काल सो चामल बाजुरामा ढुवानी गरिएको जनाइएको छ ।

उहाँले ढुवानी गरिएको चामल आजदेखि प्रतिकिलो रु. ९२ मा बिक्री हुने बताउनुभयो । बजारमा मसिना चामलको रु. ९५ मा पर्ने जनाइएको छ ।

मार्तडीको गोदाममा चामल सकिएपछि गत भदौ २४ गते एक सूचना जारी गर्दै गोदाममा ताला लगाइएको थियो ।

मार्तडीमा रहेको शाखा कार्यालयमा चामल पुगे पनि अन्य अस्थायी बिक्री केन्द्र र डिपोमा भने चामल अभाव रहेको स्थानीयले बताएका छन् । कोल्टी डिपोमा भने दुई सय क्विन्टल मौज्दात चामल रहेको बताइएको छ । मार्तडीमा रहेको शाखा कार्यालयमा आवश्यकतानुसार थप चामल आउने र अन्य बिक्री केन्द्रमा भने ठेक्का प्रक्रिया पूरा भएपछि मात्र चामल ढुवानी हुने बताइएको छ । ठेक्का प्रक्रियाको अहिलेसम्म कुनै टुङ्गो नभएको पनि प्रमुख ओझाले बताउनुभयो ।

सुदूुरपश्चिममा सबैभन्दा बढी बाजुरामा गत आर्थिक वर्षमा १७ हजार क्विन्टल चामल बिक्री भएको थियो भने चालु वर्षका लागि १२ हजार क्विन्टल कोटा निर्धारण गरिएकामा हाल दुई सय क्विन्टल आएको छ । अहिले खाद्य व्यवस्था तथा व्यापार कम्पनी प्रदेश कार्यालय धनगढीले धमाधम चाडपर्वको मुखमा पछि स्वीकृत गराउने गरी बाजुरासहित अछाम, बझाङ, डडेल्धुरा र दार्चुलालगायतका जिल्लामा चामल ढुवानी गरिरहेको छ ।

पर्यटकीय क्षेत्र रामारोशनमा लामो अवधिसम्म बस्ने अनुमति नभएपछि विदेशीलाई अछामका विभिन्न नाकामा रोकिएको छ । अनुमति नआउँदासम्म अछाम प्रवेश गर्ने मुख्य नाका चौखुट्टे, बेलखेत र अछाम प्रवेश गरिसकेकालाई रामारोशन, जयगढमा रोकिएको छ ।

विभिन्न देशबाट रामारोशनका लागि आएका १४ जनालाई अछाम प्रवेश गर्ने पश्चिमी नाका चौखुट्टेमा प्रहरीले रोकेको छ । यस्तै, पूर्वी नाका बेलखेतमा बिहीबारबाट पाँच भारतीय र बाँकी अन्य देशका मानिसलाई अछाम प्रहरीले जिल्ला प्रवेश गर्न दिएको छैन ।

जिल्ला प्रशासन कार्यालय र अछाम प्रहरीले आधिकारीक निकायबाट विदेशीलाई रामारोशनमा एक महिना बस्ने अनुमति खोजिरहेको छ । विभिन्न देशका गरेर दुई हजार जना विदेशी रामारोशनमा पुग्ने भनिएपछि स्थानीय प्रशासनले त्यसको आधिकारिकता खोजेर विदेशीलाई रोकेको हो ।

४० जना भन्दा बढी विभिन्न देशका व्यक्तिहरु भने रामारोशन पुगिसकेको बताइएको छ । इजरायल, क्यानडा, स्पेन, अमेरिका, थाइल्याण्ड, स्वीडेन, रसिया, भारत, जर्मन साउथ कोरिया, अष्ट्रेलिया लगायतका देशबाट पर्यटक आएका छन् ।

आइतबार रामारोशनमा पुगिसकेका केही विदेशीलाई बुझ्दा दुई हजारभन्दा बढी व्यक्ति रामारोशन पुग्ने भनेपछि स्थानीय प्रशासनले त्यसको आधिकारिता खोजेको छ । उनीहरुले रामारोशनमा घुम्ने, गीत गाउने, बाजा बजाउने, योग, ध्यान गर्ने भनेको सुरक्षा निकायको भनाइ छ ।

प्रमुख जिल्ला अधिकारी शरदकुमार पोखरेलका अनुसार विभिन्न देशका ठूलो संख्यामा विदेशी आएर महिना दिन बस्ने भन्ने सूचना आफूले पाएको जानकारी दिनुभयो । “दुई हजारभन्दा बढी विदेशी एक महिनासम्म रामारोशनमा बस्ने भन्ने कुरा आएको छ ।” प्रजिअ पोखरेलले भन्नुभयो ।

विदेशीलाई त्यहाँ महिना दिन बस्ने अनुमति नभएका कारण नाकामा रोकिएको बताइएको छ । “जंगलको ठाउँ छ, त्यति ठूलो संख्यालाई सुरक्षाको कुरा पनि उठ्छ, त्यसैले हामीले आधिकारिकता खोजेका हौं” प्रजिअ पोखरेलले भन्नुभयो । जिल्ला प्रशासन कार्यालयले रामारोशन गाउँपालिकालाई लिखित जानकारी मागेकोमा कुनै निकायबाट अनुमति नलिएको भन्दै गाउँपालिकाले पत्र पठाएको छ ।

विना जानकारी एकै पटक धेरै विदेशी आएकाले आफूहरुले सुदूरपश्चिम प्रदेशको सम्बन्धित मन्त्रालयसँग समन्वय गरिरहेको रामारोशन पर्यटन विकास समिति, अछामका कार्यकारी निर्देशक गंगा कुँवर बुढाले जानकारी दिनुभयो । “आवश्यक समन्वय गर्न र सुरक्षाका लागि स्थानीय प्रशासनमा निर्देशन गरिदिन भनेर हामीले प्रदेशलाई पत्र पठाएका छौं, के आउँछ हामी कुरिरहेका छौं” बुढाले भन्नुभयो ।

रामारोशनमा ध्यान, योग र रमाइलोका लागि विभिन्न देशका व्यक्ति आएको भन्ने आफूले जानकारी पाएको गाउँपालिका अध्यक्ष मानबहादुर साउदले बताउनुभयो ।  विदेशीको आधिकारिकताका लागि सुदूरपश्चिम सरकार र रामारोशन पर्यटन विकास समितिसँग आफ्नो समन्वय भइरहेको अध्यक्ष साउदको भनाइ छ । रामारोशन क्षेत्रमा पुगिसकेका विदेशीहरु भने खुला ठाउँमा त्रिपाल टाँगेर र स्थानीय खर्कमा बसिररहेका छन् ।