धनगढी – सशस्त्र प्रहरीले कैलालीबाट १० करोड ८७ लाख ८३ हजार रुपैयाँभन्दा बढीको तस्करीको सामान जफत गरेको छ। पछिल्ला दुई आर्थिक वर्षको तुलनामा चालु आर्थिक वर्षमा सशस्त्र प्रहरीले बढी परिमाणमा भन्सार छलीका सामान नियन्त्रणमा लिएको हो।

सशस्त्र प्रहरीको तथ्यांकअनुसार, आर्थिक वर्ष २०७८/०७९ मा ३ करोड ७० लाख रुपैयाँ बराबरको तस्करीको सामान जफत गरिएको थियो। आर्थिक वर्ष २०७९/०८० मा यो संख्या ४ करोड १६ लाख पुग्यो भने चालु आर्थिक वर्ष २०८०/०८१ मा १० करोड ८७ लाख रुपैयाँभन्दा बढीको सामान बरामद गरिएको छ।

सशस्त्र प्रहरीले विभिन्न महिनामा करोडौं मूल्य बराबरका अवैध सामान नियन्त्रणमा लिएको छ। चैत, कात्तिक, मंसिर र पुस महिनामा मात्र एक–एक करोडभन्दा बढीको भन्सार छलीको सामान बरामद गरिएको छ। सबैभन्दा धेरै मंसिर महिनामा १ करोड ६७ लाख रुपैयाँ बराबरको तस्करीको सामान जफत भएको छ।

नेपाल–भारत सीमाका १०१ किलोमिटर क्षेत्रका विभिन्न नाकामा सशस्त्र प्रहरीले निगरानी कडा बनाएको छ। सीमा अतिक्रमण रोक्न, अवैध आवागमन नियन्त्रण गर्न र चोरी निकासी बन्द गर्न प्रहरीले विशेष अभियान सञ्चालन गरिरहेको छ। यसका लागि कैलालीको फूलबारी, भजनी, खक्रौला, भुइँयाफाँटा, बंगराकटान, जुगेडा, खोनपुर, हिक्मतपुर, श्रीलंकाटापु लगायतका क्षेत्रमा बोर्डर आउट पोस्ट (बीओपी) स्थापना गरिएको छ।

सशस्त्र प्रहरी बल नम्बर ३४ गणका प्रमुख एसपी दलबहादुर पाण्डेका अनुसार, अवैध क्रियाकलाप रोक्न सीमामा थप निगरानी बढाइएको छ। तस्करी नियन्त्रणका लागि सशस्त्र प्रहरीको गस्ती, चेकपोस्ट र अन्य सुरक्षा गतिविधिहरू थप प्रभावकारी बनाइने उनको भनाइ छ।