सामाजिक परिवर्तनका लागि जनसँघर्ष आवश्यक: महन्थ ठाकुर

सुखड : लोकतान्त्रिक समाजवादी पार्टी (लोसपा) अध्यक्ष महन्थ ठाकुरले देशको आमूल परिवर्तनको लागि आमजनताले विराट रुप लिन सक्ने उद्घोष गरेका छन् ।

कैलालीको सुखडमा शनिबार नागरिक उन्मुक्ति पार्टी (नाउपा)ले आयोजना गरेको संघीय लोकतान्त्रिक मोर्चाको वर्तमान राजनीतिक अवस्थाबारेको जनजागरण अभियान कार्यक्रमलाई सम्बोधन गर्दै उनले सो कुरा बताएका हुन् ।

उनले भने, ‘देशमा रक्षक नै भक्षक छन् । देशमा उथलपुथल भएको छ । चुरे दोहनले प्राकृतिक प्रकोप भएको छ । वन जंगलको विनाश भएको छ । काठ, दाउरा हुुन्छ । त्यसको कुनै तथ्यांक छैन ।’

त्यस्तै लोसपा अध्यक्ष ठाकुरले देशमा जतिबेला पनि बिद्रोह हुन सक्ने उद्घोष गरेका छन् ।

महाभारतको प्रशंग उल्लेख गर्दै ठाकुरले भने, ‘अन्याय अत्याचार निर्मल गर्न महाभारत युद्ध भयो । भगवान कृष्णले अन्याय, अत्याचार अन्त्य गर्न बिराट रुप लिनुभयो । त्यस्तै, देशको आमूल परिवर्तन गर्न नेपाली जनता कुनै पनि बेला बिराट रुप लिन सक्छन् । शासकहरु नसच्चिए जुनसुकै बेला बिद्रोह हुन सक्छ ।’