३० भदौ, सुखड । कैलालीको घोडाघोडी नगरपालिकाले नगर प्रमुखदेखि वडा अध्यक्षसम्मले सेवन गरेको मदिराका लाखौँ रुपैयाँका बिल पालिकाको खर्चमा भुक्तानी गरेको खुलेको छ ।
नगरपालिकाको नाममा जारी भएका ती बिलमध्ये नगर प्रमुख खडक बहादुर रावत, उपप्रमुख, अनुगमन टोली, वडा अध्यक्ष, इलाका प्रहरी कार्यालयका नाममा समेत मदिरा खरिद भएको विवरण भेटिएको छ । यसमा प्रहरी प्रशासनसम्मको संलग्नता देखिएको स्थानीय स्रोतले दाबी गरेको छ ।
गत भदौ २४ गते जेन जी आन्दोलनको क्रममा घोडाघोडी नगरपालिकाको कार्यालयमा गरिएको आगजनीपछि भेटिएका कागजातमै यस्ता मदिराका बिल फेला परेको जेन जी समूहले जनाएको छ । प्रमुख प्रशासकीय अधिकृतदेखि लेखा प्रमुखसम्मको मिलेमतोमा लाखौँ रकम हिनामिना भएको आशंका गरिएको छ ।
आर्थिक वर्षको अन्त्यतिर कयौँ योजना तथा कार्यक्रम कागजमै पूरा गरेर भुक्तानी भएको तथ्य पनि जेन जी समूहका सदस्यहरुले खुलासा गरेका छन् ।
उनिहरूका अनुसार, मेयर, उपमेयर, वडा अध्यक्ष तथा कर्मचारीबीचको मिलेमतोमा करोडौँ रकम अपचलन हुँदै आएको र अब यसको छानबिनमा आफूहरू जुटेको दाबी गरिएको छ ।
