सुखड, पुस २२ गते ।
कैलालीको ऐतिहासिक तथा धार्मिक महत्व बोकेको घोडाघोडी नगरपालिका–७ कृतिपुरस्थित बुट्का बाबा मन्दिरमा यस वर्ष पनि माघी सङ्क्रान्ति तीर्थ मेला आयोजना हुने भएको छ । “भाषा, धर्म, संस्कृति तथा पर्यटन प्रवर्द्धन, पवित्र धार्मिक स्थल बुट्का बाबाको संरक्षण” भन्ने मूल नाराका साथ माघी सङ्क्रान्ति तीर्थ मेला–२०८२ सञ्चालन गर्न लागिएको हो ।
बुट्का बाबा मेला व्यवस्थापन समिति र घोडाघोडी मिडिया सञ्चार समूहले मंगलबार आयोजित पत्रकार सम्मेलनमार्फत मेलाबारे जानकारी गराएका हुन् । समितिका अनुसार मेला पुस ३० गतेदेखि माघ ४ गतेसम्म पाँच दिन सञ्चालन हुनेछ ।
मेलामा राष्ट्रिय तथा स्थानीय कलाकारहरूको प्रस्तुति रहनेछ भने थारु समुदायको मौलिक संस्कृति झल्काउने परम्परागत नृत्य, भेषभूषा तथा खानाका परिकारहरूको विशेष प्रदर्शन गरिने मेला व्यवस्थापन समितिका संयोजक अमन चौधरीले जानकारी दिए । साथै मेलामा थारु संस्कृति झल्किने सांस्कृतिक कार्यक्रमसँगै स्थानीय उत्पादन तथा उपभोग्य वस्तुका एक सयभन्दा बढी स्टलहरू रहने आयोजकले जनाएको छ ।
स्थानीय जानकारहरूका अनुसार २०२१ सालमा भूमि ऐन लागू भएपछि सो क्षेत्रमा बस्ती विकास भएसँगै बुट्का बाबा मन्दिरमा नियमित पूजाआजा तथा मेला लाग्दै आएको हो । बुट्का बाबा मेलामा कैलालीसहित बर्दिया, दाङ, कञ्चनपुर लगायतका जिल्लाबाट हजारौँ श्रद्धालु आउने गरेका छन् । यसका साथै भारतको तिकुनिया, पलिया लगायतका क्षेत्रबाट समेत भारतीय नागरिकहरू मेला भर्न आउने गर्छन् ।
वर्षौँदेखि लाग्दै आएको यस मेलाले थारु जातिको धार्मिक तथा सांस्कृतिक पहिचानलाई उजागर गर्दै आएको मेला व्यवस्थापन समितिका संयोजक रामबहादुर चौधरीले बताए । बुट्का बाबा मन्दिर पौराणिक किंवदन्तीअनुसार भगवान् शिवको शक्तिपीठका रूपमा चिनिन्छ । माघ महिनामा यहाँ दर्शन गर्नाले मनोकामना पूरा हुने जनविश्वास रहँदै आएको छ ।
स्थानीयका अनुसार थारु भाषामा रुखको जरालाई ‘बुट्का’ भनिन्छ । भगवान् शिवले ध्यान गरेको स्थल भएकाले यस स्थानको नाम बुट्का बाबा रहन गएको विश्वास गरिन्छ । वर्षमा एकपटक लाग्ने यस मेलाले स्थानीयवासीको आयआर्जनमा समेत टेवा पुर्‍याउँदै आएको छ । गाउँको बीच भागमा रहेको यस तीर्थस्थलमा व्यापारका लागि टाढा–टाढाबाट व्यापारीहरू आउने गर्दछन् ।