मोहना नदी मा जलपन्छीको चहलपहल यथावत, नकटा चराको उपस्थिति बढ्दो

धनगढी, चैत २४ गते । हिउँदे आगन्तुक जलपन्छी उत्तरी ध्रुवतर्फ फर्के पनि कैलालीको मोहना नदीमा जलपन्छीको चहलपहलमा कमी आएको छैन । विभिन्न प्रजातिका जलपन्छीको आगमनसँगै नदीमा चहलपहल बढेको छ । नकटा, बकुल्ला, खोले हुटिट्याउँ,सानो जलेवालगायतका रैथाने प्रजातिका चराको चहलपहल मोहना नदीमा देखिएको छ । हिउँदभरि चखेवा, खोया हाँसलगायतका आगन्तुक चराको चहलपहल थियो । साइबेरिया, मङ्गोलिया, उत्तरी चीनतर्फ गए पनि घरपालुवा हाँस जस्ता देखिने नकटा चराको उपस्थितिले थप राम्रो देखिएको छ ।

धनगढी उपमहानगरपालिकाको मोहना नदीमा यो प्रजातिका चरा धेरै देखा परिरहेको धनगढी उपमहानगरपालिका–९ का राजेश जोशीले बताउनुभयो । उहाँले मोहना नदीमा हाँस जस्ता चरा विभिन्न क्षेत्रमा बस्दै आएको जानकारी दिनुभयो ।

स्थानीयवासीका अनुसार मोहना नदी नकटा चराको क्रीडास्थल बनेको छ । बिहानदेखि साँझसम्म नदीमा नकटा चरा बस्ने, आहारविहार गर्दै रमाउने गरेका देखिने गरेको उनीहरू बताउँछन् । नेपालमा सङ्कटापन्न नकटा चरा सबैभन्दा बढी पश्चिम क्षेत्रमा पाइने गरेका छन् । कैलाली, कञ्चनपुरका विभिन्न तालतलैया, सिमसारमा यो प्रजातिको चरा बढी देखिने गरेको चराविद् हिरुलाल डङ्गौराको भनाइ छ । उहाँका अनुसार जाखोर तालमा ३६, रखौनामा ४७ र कञ्चनपुरको कालीकिच तालमा सबैभन्दा बढी ६५ वटा नकटा चरा अभिलेख गरिएको छ । मोहना नदीमा पनि ४० को हाराहारीमा नकटा चरा देखा परिरहेको जनाइएको छ ।