धनगढी, चैत २६ गते । कैलालीमा रहेको सहिद दशरथ चन्द स्वास्थ्य विज्ञान विश्वविद्यालयमा आगामी शैक्षिक सत्रबाट चिकित्सा शिक्षाको पठनपाठन सञ्चालन गर्ने निर्णय गरिएको छ । शिक्षा, विज्ञान तथा प्रविधिमन्त्री सस्मित पोखरेलको अध्यक्षतामा बुधबार बसेको विश्वविद्यालयको चौथो सभा बैठक (सिनेट) ले आगामी शैक्षिक सत्रबाट मेडिकल पठनपाठन सञ्चालन गर्ने निर्णय गरेको हो । विश्वविद्यालयमा चार विधामा अध्ययन हुने जनाइएको छ ।

पठनपाठनका लागि एमबिबिएसको ५० सिट, बिएस्सी नर्सिङको ३० सिट, ब्याचलर इन मेडिकल ल्याब टेक्नोलोजी र बी अप्टोमेरीको २०/२० सिटका लागि चिकित्सा शिक्षा आयोगमा पठाएको जनाइएको छ । यसै गरी बैठकले तीन सय शय्याको शिक्षण अस्पताल सञ्चालन गर्ने निर्णय गरेको बैठकपछि आयोजित पत्रकार सम्मेलनमा विश्वविद्यालयका उपकुलपति प्राध्यापक डाक्टर सुनीलकुमार जोशीले जानकारी दिनुभयो ।

शिक्षण अस्पताल सुरु नभइसकेको अवस्थामा यस क्षेत्रको जनतालाई स्वास्थ्य सेवा दिनका लागि नेपाल सरकारको स्वास्थ्य तथा जनसङ्ख्या मन्त्रालयले अस्पताल मात्रै सञ्चालन गरिरहेको छ । अर्को आर्थिक वर्षदेखि यसलाई शिक्षण अस्पतालका रूपमा रूपान्तरण गरिने उपकुलपति जोशीले बताउनुभयो । विश्वविद्यालयमा चिकित्सा सेवा, शिक्षा र अनुसन्धान गरी तीन वटा क्षेत्र छन् । यी तीन वटै क्षेत्रलाई लिएर अगाडि बढ्ने सन्दर्भमा बैठकमा गहन छलफल भएको पत्रकार सम्मेलनमा जनाइएको छ । “हामीले धेरै विषयमा निर्णय गरेका छौँ,” उपकुलपति जोशीले भन्नुभयो, “चार वटा शैक्षिक कार्यक्रम कसरी सञ्चालन गर्ने भन्ने विषयमा छलफल गरेका छौँ ।”

चिकित्सा शिक्षा दिनलाई शिक्षण अस्पताल चलाउनुपर्ने र यसका लागि शिक्षा र स्वास्थ्य दुवै मन्त्रालयसँग सहकार्य गर्नुपर्ने जनाइएको छ । बैठकमा कार्यकारी परिषद्का सदस्य मुख्यमन्त्री कमलबहादुर शाहलगायत उपकुलपति, रजिस्ट्रार, सल्लाहकारको उपस्थिति रहेको थियो ।

विश्वविद्यालय सरकारको प्राथमिकतामा

शिक्षा, विज्ञान तथा प्रविधिमन्त्री सस्मित पोखरेलले सहिद दशरथ चन्द स्वास्थ्य विज्ञान विश्वविद्यालय सरकारको प्राथमिकतामा रहेको बताउनुभएको छ । विश्वविद्यालयपरिसरमा आयोजित पत्रकार सम्मेलनमा उहाँले आगामी शैक्षिक सत्रमा जुनसुकै हालतमा पनि पठनपाठन सञ्चालन गर्नेतर्फ सरकार केन्द्रित रहेको उल्लेख गर्नुभयो । “आर्थिक हिसाबले कुनै पनि कमजोरी नहोस् भनेर प्रधानमन्त्रीसँग पनि सल्लाह भएको छ,” उहाँले भन्नुभयो, “आर्थिक पाटोले केही पनि बाधा नहोस् भनेर उहाँले सबैलाई निर्देशन दिनुभएको छ ।”

मन्त्री पोखरेलले विश्वविद्यालयमा पठनपाठन सञ्चालनका लागि शिक्षा र अर्थ मन्त्रालय पनि सकारात्मक रहेको उल्लेख गर्नुभयो । चिकित्सा शिक्षा आयोग पनि सकारात्मक रहेको उल्लेख गर्दै उहाँले भन्नुभयो, “अहिले राज्यको आर्थिक स्रोत हेर्दा खेरी सबै ठाउँमा कठिन नै देखिएको छ तर हाम्रो शिक्षामा प्राथमिकता भएको हुनाले कुनै पनि हालतमा आगामी सत्रदेखि पठनपाठन सुरु गर्छौं ।”

नीराजन परियार
चौमाला (कैलाली), चैत २४ गते । सहिद दशरथचन्द स्वास्थ्य विज्ञान विश्वविद्यालयको चौथो सभा बैठक भोलि (बुधबार) बिहान ९ बजेदेखि विश्वविद्यालयकै परिसरमा आयोजना हुने भएको छ।

विश्वविद्यालयका उपकुलपति प्राडा. सुनिलकुमार जोशीका अनुसार बैठकको सम्पूर्ण तयारी पूरा भइसकेको छ। यसअघिका तीन सभा (सिनेट) बैठकहरू सङ्घीय राजधानीमा भएकोमा, यस पटक पहिलोपटक विश्वविद्यालयकै परिसरमा बैठक बोलाइएको हो।

बैठकमा विश्वविद्यालयसँग सम्बन्धित नियमावली, विभिन्न कार्यविधिहरूको मनोनयन तथा अनुमोदन, आर्थिक नियमावली र खरिद नियमावलीजस्ता विषयमा छलफल हुने उपकुलपति जोशीले बताउनुभयो।

त्यसैगरी, विश्वविद्यालय अन्तर्गत सञ्चालनमा रहेको शिक्षण अस्पताललाई भविष्यमा कसरी प्रभावकारी रूपमा सञ्चालन गर्ने भन्ने विषयमा पनि बैठकमा विचार गरिने छ।

बैठकमा शिक्षामन्त्री सस्मित पोखरेल, शिक्षा सचिव, स्वास्थ्य सचिव, चिकित्सक शिक्षा आयोगका उपाध्यक्ष, विश्वविद्यालय अनुदान आयोगका अध्यक्ष, मुख्यमन्त्री लगायत १७ जनाको सहभागिता रहने छ । सभाको अध्यक्षता विश्वविद्यालयका सहकुलपतिसमेत रहेका शिक्षामन्त्रीले गर्ने व्यवस्था गरिएको छ।

विश्वविद्यालयमा यसै शैक्षिक सत्रबाट एमबिबिएस लगायत चिकित्सा शिक्षा अध्यापनको तयारी भइरहेको छ। हाल गेटा विश्वविद्यालय सञ्चालनको पर्खाइमा छ।