धनगढी, असोज २७ गते – दसैँ टीकाको दिन कैलालीमा १६ स्थानमा सवारी दुर्घटना भएका छन्। जिल्ला प्रहरी कार्यालयका अनुसार मादक पदार्थ सेवन गरी तीव्र गतिमा सवारी साधन चलाउँदा धेरै दुर्घटना भएका हुन्।
प्रहरीका प्रवक्ता, प्रहरी नायब उपरीक्षक कवीन्द्रसिंह बोहराका अनुसार दुर्घटनामा एक जनाको मृत्यु भएको छ भने कैयौँ घाइते भएका छन्। कञ्चनपुरको कृष्णपुर नगरपालिका–७ कलुवापुरमा ३५ वर्षीय गोविन्द झुकालले चलाएको सुप प्र ०१००८ प ०८५ नम्बरको मोटरसाइकलले एक पैदल यात्रीलाई ठक्कर दिँदा घटनास्थलमा मृत्यु भएको हो। धनगढी उपमहानगरपालिका–१३ स्थित एयरपोर्ट जाने चोकनजिक ६४ वर्षीय पैदल यात्री अकबर ठगुन्नालाई ठक्कर दिएपछि अस्पतालमा उपचारका क्रममा मृत्यु भएको प्रहरीले जनाएको छ।
दुर्घटनामा मोटरसाइकलमा पछाडि बसेका तीन जना घाइते भएका छन्। जसमध्ये १२ वर्षीया जेनिसा झुकाल, ३२ वर्षीया बसन्ती विष्ट र उहाँकी २ वर्षीया छोरी शिवानी विष्टलाई सामान्य चोट लागेको छ।
यस्तै, गोदावरी नगरपालिका–१ मनेहरा पुलनजिक २५ वर्षीय सुमन चौधरीले चलाएको मोटरसाइकल अनियन्त्रित भएर पल्टिँदा उहाँ घाइते हुनुभएको छ। उहाँको टाउको र छातीमा गम्भीर चोट लागेको छ र विसर्ग अस्पतालमा उपचार भइरहेको छ।
अर्को दुर्घटना धनगढी उपमहानगरपालिका–७ मा भएको हो। जहाँ २५ वर्षीय शिवलाल रानाले चलाएको मोटरसाइकलले छाडा गाईलाई ठक्कर दिँदा पछाडि सवार ३० वर्षीय जीवन राना घाइते भएका छन्। उहाँको अनुहारमा चोट लागेको छ।
यसैगरी, धनगढीतर्फ गइरहेको मोटरसाइकलले अटोलाई पछाडिबाट ठक्कर दिँदा तीन जना घाइते भएका छन्। घाइते हुनेहरूमा २३ वर्षीय विक्रम दहित, १७ वर्षीय विशेष चौधरी र ४० वर्षीय अटो चालक बहादुर महतारा छन्। उनीहरूको सेती प्रादेशिक अस्पतालमा उपचार भइरहेको छ र अवस्था खतरामुक्त रहेको जनाइएको छ।
